प्रतिनिधी \ बेळगाव
रेल्वेरूळ ओलांडताना भांदूर गल्ली, अनगोळ येथील एका वृद्धाचा रेल्वेच्या धडकेने मृत्यू झाला. सोमवारी दुपारी चौथ्या रेल्वेगेटजवळ ही घटना घडली असून बेळगाव रेल्वे पोलीस स्थानकात या घटनेची नोंद झाली आहे.
हावण्णा भुजंग जवरुचे (वय 58) असे त्या दुर्दैवीचे नाव आहे. हावण्णा हे उद्यमबागमधील एका कारखान्यात काम करीत होते. रेल्वेरूळ ओलांडताना रेल्वेची धडक बसून त्यांचा मृत्यू झाला. घटनेची माहिती समजताच रेल्वे पोलिसांनी घटनास्थळी भेट देऊन पंचनामा केला. त्यांच्या पश्चात पत्नी, एक मुलगा, सून, दोन मुली, नातवंडे असा परिवार आहे.