गारगोटी / प्रतिनिधी
आकुर्डे ता. भुदरगड येथील पती, पत्नीने आजारास कंटाळून गळफास घेऊन आत्महत्या केली. सदाशिव बाळू भांदिगरे (वय 62) सुरेखा सदाशिव भांदिगरे (वय 57) अशी त्यांची नाव आहेत. या घटनेची नोंद भुदरगड पोलीसांत झाली आहे.
तालुक्यातील आकुर्डे इथले सदाशिव भांदिगरे व त्यांची पत्नी सुरेखा हे दोघेही सतत आजारी असल्याने त्यांच्यावर औषधोपचार सुरु होते. आज दुपारी घरात कोणी नसल्याचे पाहून 12.30 वाजण्याच्या सुमारास घराला लागून असलेल्या जनावारांच्या गोठ्यात लोखंडी पाइपला दोरी लावून पती, पत्नीने गळफास घेतला.
सकाळपासून दोघांचीही चाहुल न लागल्यामुळे शोधाशोध केली असता भांदिगरे पती, पत्नीचा मृतदेह गोठ्यात लोंबकळत असल्याचे निदर्शनास आले. त्याची वर्दी सदाशिव यांचा भाऊ निवृत्ती भांदिगरे यांनी पोलीसांत दिली. भांदिगरे दांम्पत्यास दोन विवाहित मुले आहेत. गारगोटी ग्रामीण रूग्णालयात शवविच्छेदन करून मृतदेह नातेवाईकांच्या ताब्यात देण्यात आले. पती, पत्नीच्या आत्महत्येचे वृत्त आकुर्डे गावात समजताच नागरीकांनी घटनास्थळी मोठी गर्दी केली होती.