प्रतिनिधी / बेळगाव
इंडियन रेडक्रॉस सोसायटीच्या बेळगाव जिल्हा शाखेतर्फे नुकताच रेडक्रॉस दिन साजरा करण्यात आला. बिम्स हॉस्पिटलच्या आवारात झालेल्या कार्यक्रमात रेडक्रॉसचे संस्थापक जेन हेन्री डय़ूनंट यांच्या स्मृतीला अभिवादन करण्यात आले. याचवेळी बिम्सच्या नूतन इमारतीमध्ये बांधकाम कामगार म्हणून काम करत असलेल्या सर्वांना मास्क आणि मिठाई वितरित करण्यात आली.
याप्रसंगी रेडक्रॉस शाखेचे सचिव डॉ. डी. एन. मिसाळे म्हणाले, सध्या सर्व जग कोरोनाशी लढत आहे. अनेकांच्या आशा हरपल्या आहेत. अशावेळी रेडक्रॉस ही संस्था मानवी समूहाला मदत करण्यासाठी सदैव तत्पर राहिली आहे. रेडक्रॉसने अन्य संस्थांच्या सहकार्याने आजपर्यंत आपत्ती काळात प्रथमोपचार, रक्तदान व अन्य स्वरुपाचे मदतकार्य हाती घेतले आहे. याप्रसंगी चेअरमन अशोक बदामी, खजिनदार कर्नल विनोदिनी शर्मा, सदस्य सुमन हिरेमठ, प्रवीण हिरेमठ व अन्य उपस्थित होते.