वार्ताहर/ कराड
कोरोनाचा संसर्ग रोखण्यासाठी प्रशासनाने वाहतुकीची नवीन नियमावली जाहीर केली आहे. त्यानुसार दुचाकीवरून एकटय़ानेच प्रवास करावयाचा असतानाही कराड शहरातून डबल सीट प्रवास करणाऱया दुचाकीस्वारांवर वाहतूक पोलिसांकडून दंडात्मक कारवाईची मोहीम सुरू करण्यात आली आहे. दोनपेक्षा जास्त प्रवासी घेणाऱया चार चाकी व रिक्षांवरही कारवाई करण्यात येत आहे.
कोरोनाचा फैलाव रोखण्यासाठी सोशल डिस्टन्स महत्वाचे असल्याने लॉकडाऊन शिथील करताना प्रशासनाने वाहतुकीसंदर्भात नवीन नियमावली जाहीर केली आहे. त्यानुसार दुचाकीवरून केवळ एकटय़ानेच प्रवास करता येणार आहे. तर रिक्षा व चारचाकी वाहनांत चालक व दोन प्रवाशांना प्रवास करता येणार आहे. असे असताना शहरात मात्र काही दुचाकीस्वार डबल व ट्रिपल सीट फिरताना दिसत आहेत. तर रिक्षा व चारचाकीतही दोनपेक्षा जास्त प्रवासी बसलेले दिसत आहेत.
वाहतूक पोलिसांनी नियमांची पायमल्ली करणाऱया वाहनचालकांविरोधात कारवाईची मोहीम हाती घेतली आहे. डबल सीट प्रवास करणाऱया दुचाकी व दोन पेक्षा जास्त प्रवासी असणाऱया रिक्षा व चारचाकी वाहन चालकांविरोधात दंडात्मक कारवाई करण्यात येत आहे. बुधवारी दिवसभर पाऊस सुरू असतानाही भर पावसात पोलिसांची कारवाई सुरू होती.