ऑनलाईन टीम / श्रीनगर :
जम्मू-काश्मीरच्या कुलगाममध्ये सुरक्षा दल आणि दहशतवाद्यांमध्ये शनिवारी सकाळी झालेल्या चकमकीत दोन दहशतवाद्यांना कंठस्नान घालण्यात सुरक्षा दलाला यश आले.
कुलगाम जिल्ह्यातील चिंगम परिसरात काही दहशतवादी लपल्याची माहिती सुरक्षा दलाला मिळाली होती. त्यानुसार सुरक्षा दल आणि जम्मू पोलिसांनी शोधमोहीम हाती घेतली. दरम्यान, एका घरात लपून बसलेल्या दहशतवाद्यांना सरेंडर करण्यास सांगण्यात आले. मात्र, दहशतवाद्यांनी सुरक्षा दलाच्या जवानांवर गोळीबार करण्यास सुरुवात केली. भारतीय जवानांनी या गोळीबाराला चोख प्रत्युत्तर दिले. या कारवाईत दोन दहशतवाद्यांना कंठस्नान घालण्यात जवानांना यश आले.
जवानांनी दहशतवाद्यांकडील एम-4 रायफल आणि एक पिस्तुल हस्तगत केले आहे. तसेच चिंगम परिसरात जवानांकडून शोधमोहीम राबवली जात आहे.