शारजाह / वृत्तसंस्था
आज (मंगळवार दि. 28) होणाऱया आयपीएल साखळी सामन्यात दिल्ली कॅपिटल्सचा संघ केकेआरविरुद्ध लढतीसाठी मैदानात उतरेल, त्यावेळी त्यांच्यासमोर प्ले-ऑफमधील स्थान निश्चित करण्याचे लक्ष्य असणार आहे. केकेआरचा अव्वल खेळाडू आंद्रे रसेल या लढतीत खेळू शकणार का, याबद्दल अनिश्चितता आहे. ही लढत भारतीय प्रमाणवेळेनुसार दुपारी 3.30 वाजता खेळवली जाईल.
सोमवारच्या लढतीपूर्वी दिल्लीचा संघ गुणतालिकेत दुसऱया स्थानी विराजमान होता. दिल्लीने या उर्वरित टप्प्यात आक्रमक क्रिकेट खेळले असून यात सातत्य राखण्याचा त्यांचा येथेही प्रयत्न असेल. दिल्लीने 10 सामन्यात 8 विजयासह 16 गुण वसूल केले आहेत. मागील लढतीत त्यांनी राजस्थान रॉयल्सचा धुव्वा उडवला होता. दोनवेळचे आयपीएल विजेते केकेआरने 4 विजय व 6 पराभव अशी कामगिरी नोंदवली आहे.
केकेआरला मागील लढतीत चेन्नई सुपरकिंग्सने धूळ चारली, त्यावेळी रसेलची त्यांना प्रकर्षाने उणीव जाणवली होती. रसेल धोंडशिरेच्या दुखापतीमुळे मैदानातून बाहेर निघून गेल्यानंतर त्याची उर्वरित 3 षटके करवून घेणे केकेआरसाठी डोकेदुखी ठरले होते. त्याच्या गैरहजेरीत प्रसिद्ध कृष्णाने प्रारंभी उत्तम मारा केला. पण, नंतर जडेजाला रोखण्यात त्याला यश आले नव्हते.