प्रतिनिधी/ बेळगाव
पावसामुळे कोतवाल गल्ली येथील एका घराची भिंत कोसळून नुकसान झाले आहे. शुक्रवारी पहाटे 5 वाजण्याच्या सुमारास ही घटना घडली असून सुदैवाने या घटनेत जीवीत हानी झाली नाही.
मैनुद्दीन कोतवाल यांच्या स्वयंपाक घराची भिंत कोसळून नुकसान झाले आहे. फ्रिज, कपडे, भांडीकोंडी, गृहोपयोगी वस्तुंचे नुकसान झाले असून या घटनेत सुमारे दीड लाखांची हानी झाल्याची माहिती मैनुद्दीन यांनी दिली. भिंत कोसळल्याने मैनुद्दीन यांचे कुटुंबिय संकटात सापडले आहेत.
ही घटना घडली त्यावेळी मैनुद्दीन व त्यांची पत्नी दोघेच घरात होते. हे दांपत्य दुसऱया खोलीत झोपले होते. पहाटे पाच वाजण्याच्या सुमारास भिंत पडल्याचा आवाज आला. त्यामुळे दांपत्याला खडबडून जाग आली. त्यांनी उठून पाहिले असता स्वयंपाक घरात भिंत कोसळल्याचे निदर्शनास आले.