ऑनलाईन टीम / वॉशिंग्टन :
हवेतून कोरोना विषाणूचा संसर्ग होत असल्याचा दावा मागील आठवड्यात 32 देशातील शास्त्रज्ञांनी केला होता. जागतिक आरोग्य संघटनेनेही ही बाब मान्य करत पुराव्यांची आवश्यकता असल्याचे म्हटले आहे. दरम्यान, कोरोनाचा हवेतून संसर्ग होऊ नये म्हणून, WHO ने नव्या गाईडलाईन्स जारी केल्या आहेत.
हॉटेल, रेस्टॉरंट, फिटनेस क्लब याठिकाणी सुद्धा कोरोना विषाणू पसरू शकतो, अशी शक्यता WHO ने व्यक्त केली आहे. त्यामुळे चांगले व्हेंटिलेशन असलेल्या ठिकाणीच जाणे, गर्दीच्या ठिकाणी जाणे टाळणे, सतत फेस मास्क वापरणे, सोशल डिस्टन्सिंग ठेवणे आणि हॅन्ड वॉश करणे आवश्यक आहे.
बंद खोलीत अधिक काळासाठी बाधित व्यक्ती राहिल्यासही कोरोना व्हायरसचा संसर्ग त्या ठिकाणी असलेल्या हवेतून पसरण्याची भीती WHO ने व्यक्त केली आहे. त्यामुळे अशा ठिकाणांपासून दूर राहिले पाहिजे. तसेच अन्य कोणत्या ठिकाणांहून कोरोनाचा विषाणू पसरू शकतो, याबाबत WHO ची विविध देशातील शास्त्रज्ञांसोबत चर्चा सुरू आहे.