उचगाव / वार्ताहर
अचानक आलेल्या वादळी पावसामुळे गांधीनगर ता.करवीर येथील दोन ठिकाणी झाडे कोसळून व तीन ठिकाणच्या इमारती वरील पत्र्याचे शेड उडाली. त्यामध्ये तीन मोटारसायकलसह एका चार चाकी चे मोठे नुकसान झाले.
गांधीनगर येथील गांधी पुतळा शेजारी वादळी पावसाने मोठे झाड रस्त्यावर कोसळले. हरे माधव मंदिर येथे ही झाड कोसळले. रस्त्यावर कोणीही नसताना ही झाडे कोसळल्याने जीवित हानी टळली . तसेच वळीवडे हद्दीत हुले मळा येथील कवरराम कॉलनी मध्ये मोठ्या तीन इमारती वरील पत्र्याची शेड वादळाने कोसळून इमारती खाली पार्किंग केलेल्या तीन दुचाकी व एका चार चाकी वर हे शेड पडल्याने गाड्यांचे मोठे नुकसान झाले.
तसेच शेड चा काही भाग इमारतीच्या आजूबाजूला असणाऱ्या काचेच्या खिडक्यावर पडल्याने इमारतीचे ही मोठे नुकसान झाले आहे. अनेक ठिकाणी विद्युत तारा तुटल्याने वीज पुरवठा खंडित झाला आहे. खंडित झालेला विद्युत पुरवठा सुरळीत करण्याचे काम महावितरणचे कर्मचारी करत होते.