केंद्राविरोधात दिल्लीत सुरू असणाऱया आंदोलनाला पाठिंबा
वार्ताहर/ हुबळी
केंद्र सरकारच्या नूतन कृषी कायद्यांविरोधात दिल्लीत सुरू असलेल्या आंदोलनाला पाठिंबा देऊन शनिवारी धारवाडमध्ये विविध शेतकरी संघटनांनी ट्रक्टरवरून मोर्चा काढला. धारवाडच्या कला भवनपासून निघालेला टॅक्टर मोर्चा सुभाष रोड, विवेकानंद सर्कल, केसीसी बँक सर्कलमार्गे पुन्हा कला भवन येथे दाखल झाला. आंदोलनावेळी शेतकऱयांनी केंद्र सरकारविरोधात धिक्काराच्या घोषणा दिल्या. शेतकरीविरोधी कायदे केंद्र सरकारने मागे घ्यावेत. शेतकऱयांचे हित जोपासण्याच्या दृष्टीने पावले उचलावीत, अशा मागण्या यावेळी करण्यात आल्या. माजी केंद्रीय मंत्री बाबागौडा पाटील, प्रदेश काँग्रेसचे प्रसारमाध्यम विश्लेषक पी. एच. निरलकेरी, माजी खासदार प्रा. आय. जी. सनदी, गणेश देवी, शंकर हलगत्ती, भीमप्पा कसायी तसेच मोठय़ा संख्येने शेतकरी आंदोलनात सहभागी झाले होते.