ऑनलाईन टीम / सिंधुदुर्ग :
राज्याचे अल्पसंख्यांक मंत्री आणि राष्ट्रवादीचे नेते नवाब मलिक हे पाकिस्तानचे एजंट आणि ड्रग्ज माफियांचे ब्रँड ॲम्बेसिडर आहेत, असा आरोप आमदार नितेश राणे यांनी केला आहे.
मुंबई क्रूझ ड्रग्ज प्रकरणात आर्यन खानला एनसीबीने अटक केल्यापासून राष्ट्रवादीचे नेते नवाब मलिक यांनी या कारवाईवर प्रश्नचिन्ह उपस्थित केले आहे. तसेच ते एनसीबीचे मुंबई झोनचे डायरेक्टर समीर वानखेडे यांना वारंवार टार्गेट करत आहेत. त्यावरुन आमदार नितेश राणे यांनी मलिक यांच्यावर गंभीर आरोप केले आहेत. राणे म्हणाले, शिवसेनेची सत्ता असताना समीर वानखेडे या मराठी माणसाला टार्गेट केले जात आहे. मलिकांकडून प्रामाणिक काम करणाऱया वानखेडेंचे खच्चीकरण करण्याचे प्रयत्न सुरू आहेत. जावयाला अटक केली म्हणून मलिकांकडून एनसीबीवर टीका करण्याचा प्रकार सुरू आहे. मलिक पाकिस्तानचे एजंट झालेले आहेत. पाकिस्तानच्या ड्रग्ज माफियांचे ते ब्रँड ॲम्बेसिडर आहेत.