ऑनलाईन टीम / वेलिंग्टन :
महिला कर्मचाऱ्याशी अनैतिक संबंध ठेवल्याचा कारणावरून न्यूझीलंडमध्ये एका मंत्र्याची मंत्रीमंडळातून हकालपट्टी करण्यात आली आहे. न्यूझीलंडच्या पंतप्रधान जेसिंडा अर्डर्न यांनी ही कारवाई केली.
इयान लीस-गॅलोवे असे मंत्रीमंडळातून हकालपट्टी करण्यात आलेल्या मंत्र्याचे नाव आहे. ते अर्डर्न यांच्या मंत्रिमंडळात होते.लीस-गॅलोवे यांच्या अखत्यारीत असलेल्या एका विभागात संबंधित महिला कार्यरत होती. त्यानंतर तिची नेमणूक या मंत्र्याच्या कार्यालयात करण्यात आली होती. लीस-गॅलोवे यांचे एका महिलेसोबत जवळपास एक वर्षापासून संबंध होते. त्यांनी या कृत्याबाबत माफी मागितली होती. मात्र, पंतप्रधान अर्डर्न यांनी या प्रकरणाची गंभीरता लक्षात घेत लीस-गॅलोवे यांच्यावर कारवाई केली.
लीस-गॅलोवे यांनीही आपल्या कृत्याची कबुली देऊन, माफी मागितली. तसेच मंत्री पदावर असताना आपण चुकीचे काम केले असून, पदावर राहण्याचा नैतिक अधिकार नसल्याचेही त्यांनी म्हटले आहे.