वृत्तसंस्था/ जम्मू
प्रत्यक्ष नियंत्रण रेषेवरील (एलओसी) परिसरातील गावे आणि पूंछ आणि काठुरा जिल्हय़ातील आंतरराष्ट्रीय सीमेवर पाकिस्तानकडून सुरू असणारे शस्त्रसंधीचे उल्लंघन रविवारीही सुरूच राहिले. कसबा आणि केरेन सेक्टरमध्ये करण्यात आलेल्या उखळी तोफांच्या माऱयात महिला गंभीर जखमी झाली, अशी माहिती भारतीय सैन्यदलाच्या प्रवक्त्यांनी दिली.
मागील दोन दिवसांपासून दहशतवाद्यांच्या घुसखोरीसाठी सीमेवर पाकिस्तानकडून अंदाधुंद गोळीबार आणि उखळी तोफांचा मारा सुरू आहे. भारतीय सैन्यदलाने शनिवारी चोख प्रत्युत्तर देत पाकिस्तानच्या 12 सैनिकांना कंठस्नान घातले होते. तसेच शस्त्रकोठारेही उडवून दिली होती. रविवारी पाकिस्तानने केलेल्या तोफगोळय़ांच्या माऱयात एक महिला गंभीर जखमी झाली. तसेच शेकडो घरांचेही मोठे नुकसान झाले आहे. जखमी महिलेला भारतीय जवानांनी हॉस्पिटलमध्ये दाखल केले आहे.