वृत्तसंस्था/ इस्लामाबाद
पुढील महिन्यात अबु धाबीत पाक सुपर लीग क्रिकेट स्पर्धा खेळविली जाणार आहे. दरम्यान या स्पर्धेत भाग घेणारा 18 वर्षीय नसीम शहाने स्पर्धेच्या कोरोना संदर्भातील नियमांचे उल्लंघन केल्याने त्याची या स्पर्धेतून हकालपट्टी करण्यात आली आहे. नसीम शहाचे सोमवारी लाहोरमध्ये आगमन झाले. लाहोरमधील एका हॉटेलमध्ये शहाच्या संघाची राहण्याची सोय करण्यात आली होती. या स्पर्धेसाठी पाकचे सर्व खेळाडू बुधवारी अबु धाबीला प्रयाण करणार आहेत. तत्पूर्वी या सर्व खेळाडूंची 48 तास अगोदर कोरोना चाचणी घेतली जाणार आहे. पण शहाने 18 मे रोजी केलेल्या कोरोना चाचणीचा अहवाल सादर केल्याने त्याची पाक सुपर लीग स्पर्धेतून हकालपट्टी करण्यात आली आहे. कोरोना संदर्भातील नियमांचे पालन न केल्याने त्याच्यावर ही कारवाई करण्यात आली आहे