बेंगळूर/प्रतिनिधी
राज्यात बरेच रुग्ण कोरोनावर घरी अलग राहून उपचार घेत आहे. बेंगळूर, कोदिहळ्ळी येथे घरी उपचार घेणाऱ्या रुग्णांना ऑक्सिजनची गरज भासल्यानंतर घरातील एका महिलेला ऑनलाईन ऑक्सिजन शोधणे महागात पडले. या महिलेला ऑक्सिजन पुरवठा करण्याच्या नावाखाली एका व्यक्तीने १.६२ लाखाला गंडा घातला आहे.
पोलिसांनी दिलेल्या माहितीनुसार, कोदिहळ्ळी येथे राहणाऱ्या एका कुटुंबातील दोन सदस्यांना कोरोनाची लागण झाली आहे आणि घरी ते अलगीकरणात आहेत. त्यांना ऑक्सिजनची आवश्यकता होती. त्यानतर ही महिला ऑक्सिजन सिलिंडर पुरवठा करणाऱ्यांविषयी इंटरनेटवर माहिती शोधत होती. मग तिने एका व्यक्तीला ऑक्सिजन पुरवठा करण्यास सांगितले.
दरम्यान या युवकाने महिलेला १.६२ लाख रूपये जमा करण्यास सांगितले व वाहनाची परवानगी व इतर कर भरण्यास सांगितले आणि नंतर ही रक्कम परत केली जाईल असे सांगितले. महिलेने पैसे जमा केले पण त्यांना ऑक्सिजन मिळाला नाही. काही वेळानंतर महिलेला आपली फसवणूक झाल्याचे समजताच तिने पोलिसात तक्रार दिली आहे. पोलिसांनी महिलेच्या सांगण्यावरून गुन्हा दाखल करत तपास सुरु ठेवला आहे.