युनियन जिमखाना मैदानावरील सन्निधी टी-10 क्रिकेट स्पर्धा : शिवप्रकाश, वेंकटेश, आनंद कुंभार सामनावीर पुरस्काराचे मानकरी
क्रीडा प्रतिनिधी /बेळगाव
युनियन जिमखाना मैदानावर नीना स्पोर्ट्स क्लब आयोजित सन्निधी टी -10 क्रिकेट स्पर्धेत आज खेळविण्यात आलेल्या सामन्यातून आनंद क्रिकेट अकादमी संघाने बेळगाव लायन संघाचा तर बेळगाव स्पोर्ट्स संघाने इंडियन बॉईज संघाचा पराभव करून प्रत्येकी 3 गुण मिळविले. वेंकटेश शिराळकर, आनंद कुंभार, शिवप्रकाश हिरेमठ यांना सामनावीर पुरस्कार देण्यात आला.
युनियन जिमखाना मैदानावर पहिल्या सामन्यात बेळगाव लॉयन संघाने प्रथम फलंदाजी करताना 10 षटकात 5 बाद 69 धावा केल्या. गणेश जांभळेने 2 षटकार 2 चौकारासह नाबाद 27 तर प्रणव सोमण्णावरने 2 षटकारासह 18 धावा केल्या. आनंद क्रिकेट अकादमीतर्फे आनंद कुंभारने 4 धावात 4 तर हर्ष पॅट्रॉटने 1 गडी बाद केला. प्रत्युत्तरादाखल आनंद क्रिकेट अकादमी संघाने 7.1 षटकात 2 बाद 70 धावांसह एकतर्फी विजय नोंदवला. शिवप्रकाश हिरेमठने 1 षटकार 3 चौकारासह 26, नागेंद्र पाटीलने 4 चौकारासह 25 धावा केल्या. बेळगाव लायन्सतर्फे करण यळगुकर, इस्माईल सय्यद यांनी प्रत्येकी 1 गडी बाद केला.
दुसऱया सामन्यात बेळगाव स्पोर्ट्स क्लब संघाने 10 षटकात 3 बाद 151 धावा केल्या. त्यात वेंकटेश शिराळकरने 5 षटकार 1 चौकारासह 12 चेंडूत 42, पार्थ पाटीलने 3 षटकार 3 चौकारासह 36 तर विजय पाटीलने 4 षटकारासह नाबाद 34 धावा केल्या. इंडियन बॉईजतर्फे अकबर काझी, तारीख पटवेकर, शरिफ देसाई यांनी प्रत्येकी 1 गडी बाद केला. प्रत्युत्तरादाखल इंडियन बॉईज संघाने 10 षटकात 6 बाद केवळ 58 धावाच केल्या. त्यात शोहब मन्नूरवालेने 1 षटकार 2 चौकारासह 21, निहाल पटेलने 17 धावा केल्या. बीएससी तर्फे अमर घाळीने 2 गडी बाद केले,
तिसऱया सामन्यात आनंद क्रिकेट अकादमीने प्रथम फलंदाजी करताना 10 षटकात 3 बाद 101 धावा केल्या. शिवप्रकाश हिरेमठने 2 षटकार 6 चौकारासह नाबाद 56 तर साहिल पारिश्वाडने नाबाद 21 धावा केल्या. प्रत्युत्तरादाखल इंडियन बॉईजने 10 षटकात 7 गडी बाद 53 धावाच केल्या. शोहेब मन्नूरवालेने 12 धावा केल्या. आनंदतर्फे तुषार चौगुलेने 7 धावात 3 तर राहुल वाजंत्रीने 2 गडी बाद केले.
बुधवारी पहिला उपांत्य सामना के. आर. शेट्टी वि. आनंद अकादमी सकाळी 11 वाजता तर बेळगाव स्पोर्ट्स क्लब वि. युनियन जिमखाना यांच्यात 1 वाजता दुसरा उपांत्य सामना होईल. अंतिम सामना दुपारी 3 वाजता खेळविला जाणार आहे.