ऑनलाईन टीम / भोपाळ :
मध्य प्रदेशची राजधानी असलेल्या भोपाळच्या खासदार प्रज्ञा सिंग ठाकूर यांना श्वासोच्छवासाचा त्रास होवू लागल्याने आज मुंबई येथे उपचारासाठी हलविण्यात आले आहे. त्यांना शहरातील कोकिलाबेन रुग्णालयात दाखल करण्यात आले आहे, अशी माहिती खासदार कार्यालयाने दिली.
प्रज्ञा सिंग ठाकूर यांना एका महिन्यात रुग्णालयात दाखल करण्याची ही दुसरी वेळ आहे. यापूर्वी 1 फेब्रुवारीला त्यांना अशाच मुद्द्यांसाठी नवी दिल्लीतील अखिल भारतीय वैद्यकीय विज्ञान संस्थान (एम्स) येथे नेण्यात आले होते. यापूर्वी, कोविड – 19 ची लक्षण दिसू लागल्यानंतर डिसेंबर 2020 मध्ये त्यांना एम्समध्ये दाखल केले गेले होते.
दरम्यान, 2008 च्या मालेगाव बॉम्बस्फोटातील एक प्रमुख आरोपी म्हणुन त्यांचे नाव घेतले जाते. या दुर्घटनेत 10 लोक ठार आणि अनेकजण जखमी झाले होते. 2017 मध्ये त्यांना राष्ट्रीय तपास यंत्रणेने आरोग्याच्या कारणावरून जामीन मंजूर केला होता.