लोणावळा / प्रतिनिधी :
लोणावळा नगरपरिषदेच्या विषय समिती सभापतीपदाच्या निवडणुकीत भाजपाचे गटनेते व मित्र पक्षांच्या उमेदवारांच्या विरोधात मतदान करत विरोधी पक्षाला मदत करणाऱया महिला नगरसेविका गौरी मावकर व मतदानाच्या वेळी सभागृहात गैरहजर राहणारे नगरसेवक भरत हारपुडे व जयश्री आहेर या तिघांची पक्षातून हकालपट्टी करण्यात येणार असल्याची माहिती भाजपा शहराध्यक्ष रामविलास खंडेलवाल व प्रभारी नगराध्यक्ष श्रीधर पुजारी यांनी सोमवारी दिली. तर याप्रकरणी तिन्ही नगरसेवकांची पदे रद्द करण्याची मागणी जिल्हाधिकारी पुणे यांच्याकडे करण्यात येणार असल्याचे पुजारी व गटनेते देविदास कडू यांनी पत्रकार परिषदेत सांगितले.
भाजपाच्या तिन्ही नगरसेवकांनी जाणिवपूर्वक व ठरवून आर्थिक देवाणघेवाण करत भाजपाचे गटनेते देविदास कडू, सहयोगी पक्ष असलेल्या आरपीआयचे नगरसेवक दिलीप दामोदरे व काँग्रेसचे नगरसेवक सुधीर शिर्के यांच्याविरोधात मतदान केले, गैरहजर राहिले. हा सरळसरळ विश्वासघात असल्याने या तिन्ही लोकप्रतिनिधींची पक्षातून हकालपट्टी करण्यात येणार आहे. तसेच भविष्यात त्यांच्यावर कसलाही विश्वास न ठेवता पक्षाचा व्हिप बजावण्यात येणार आहे. या व्हिपचे उल्लंघन केल्यास पद रद्दबातलची कारवाई करण्यात येणार आहे. दरम्यान, लोणावळा नगरपरिषदेत भाजपा, आरपीआय व काँग्रेस यांची सत्ता असून शिवसेना विरोधात आहे.