वृत्तसंस्था / नवी दिल्ली
देशातील इलाईट गटातील तसेच युवा ऍथलीट्सचा दर्जा सुधारण्यासाठी भारतीय क्रीडा प्राधिकरण मंडळाने (साई) साहाय्यक प्रशिक्षकांसाठी माजी ऑलिंपिकपटू आणि पॅरा ऑलिंपिकपटूंना निमंत्रण देण्याचे ठरविले आहे.
देशातील नवोदित युवा अथलीट्स आणि इलाईट गटातील क्रीडापटूंचा दर्जा उंचावण्यासाठी भारतीय क्रीडा प्राधिकरण मंडळाने ही नवी योजना अमलात आणण्याचे ठरविले आहे. साहाय्यक प्रशिक्षक (लेव्हल 6) आणि प्रशिक्षक (लेव्हल 10) पदासाठी साईने भारताच्या माजी ऑलिंपिकपटू तसेच माजी पॅरा ऑलिंपिकपटूंना नियुक्त करण्याचे ठरविले आहे. त्यामुळे या माजी ऑलिंपिक ऍथलीट्सना साईमध्ये प्रशिक्षण देण्याची संधी उपलब्ध होणार आहे. इच्छुक माजी ऍथलीट्सनी या पदासाठी 5 ते 26 जानेवारीपर्यंत आपले अर्ज साईकडे पाठविणे जरूरीचे आहे. साईतर्फे या नव्या योजनेमध्ये 11 माजी ऑलिंपिकपटू आणि तीन माजी पॅरा ऑलिंपिकपटू यांची नियुक्ती केली जाणार आहे.