ऑनलाईन टीम / क्यिव :
युक्रेनच्या लष्कराचे An-26 हे विमान खार्खिवमधील चुहुइव्ह विमानतळावर उतरताना कोसळले. या दुर्घटनेनंतर लागलेल्या भीषण आगीत प्रशिक्षणार्थी विद्यार्थ्यांसह 22 जणांचा होरपळून मृत्यू झाला. 2 जण जखमी झाले असून, 4 जण अद्याप बेपत्ता आहेत. युक्रेनच्या संरक्षण विभागाने यासंदर्भात माहिती दिली आहे.
युक्रेनच्या लष्करी विमानातून एव्हीएशन स्कूलचे विद्यार्थी प्रवास करत होते. 21 विद्यार्थी, 7 विमानातील क्रू मेंबर्स असे एकूण 28 जण प्रवास करत होते. हे विमान विमानतळावर उतरत असताना कोसळले. स्थानिक वेळेनुसार रात्री 8 वाजून 45 मिनिटांनी ही घटना घडली. हा अपघात नेमका कशामुळे झाला याच कारण अद्याप समोर आले नाही. या प्रकरणी सध्या बचावकार्य सुरू असून, चौकशीचे आदेश देण्यात आले आहेत.
विमान धावपट्टीवर कोसळल्यानंतर विमानाने पेट घेतला. या घटनेचा व्हिडीओही समोर आला आहे.