प्रतिनिधी /बेळगाव
विश्वेश्वरय्या तांत्रिक विद्यापीठ (व्हीटीयू) बेळगावने राज्यातील सहा इंजिनिअरिंग कॉलेजची मान्यता रद्द करण्याचे आदेश दिले आहेत. गुणवत्तेचा घसरलेला दर्जा व पुरेशा सुविधा नसल्याने विद्यापीठाने हा निर्णय घेतला. यामध्ये बेळगाव जिल्हय़ातील एका इंजिनिअरिंग कॉलेजचा समावेश आहे.
विद्यापीठाच्या कार्यकारिणी सदस्यांच्या नुकत्याच झालेल्या बैठकीत हा निर्णय घेण्यात आला. सन 2021-22 या शैक्षणिक वर्षापासूनच या महाविद्यालयांची मान्यता रद्द करण्यात आली आहे. बेंगळूर येथील अल्फा कॉलेज ऑफ इंजिनिअरिंग, बेळगाव येथील शेख कॉलेज ऑफ इंजिनिअरिंग, बेंगळूर येथील इस्लामिया इन्स्टिटय़ूट ऑफ टेक्नॉलॉजी, चामराजनगर येथील एकलव्य इन्स्टिटय़ूट ऑफ टेक्नॉलॉजी, बेंगळूर येथील श्रीविनायका इन्स्टिटय़ूट ऑफ टेक्नॉलॉजी व बीटीएल इन्स्टिटय़ूट ऑफ टेक्नॉलॉजी या कॉलेजचा समावेश असल्याची माहिती व्हीटीयूच्या सूत्रांकडून देण्यात आली आहे.
उपलब्ध माहितीनुसार बेंगळूर येथील एक व बेळगाव येथील एका कॉलेज मॅनेजमेंटने आर्थिकदृष्टय़ा कॉलेजचा खर्च परवडत नसल्याने इंजिनिअरिंग अभ्यासक्रम बंद करावा, अशी मागणी व्हीटीयूकडे केली होती. असुविधा तसेच अत्यल्प संख्येने विद्यार्थ्यांचे प्रवेश यामुळे कॉलेज प्रशासनाने हा निर्णय घेतला.
या सहा कॉलेजमध्ये शिकत असलेल्या विद्यार्थ्यांना इतर कॉलेजमध्ये प्रवेश दिला जाणार आहे. मागील दोन वर्षांमध्ये व्हीटीयूअंतर्गत येणाऱया 12 कॉलेजनी इंजिनिअरिंग अभ्यासक्रम थांबविला आहे. यामुळे विद्यार्थ्यांनी प्रवेश घेताना कॉलेजची मान्यता पाहूनच प्रवेश घेणे जरूरीचे आहे.