ऑनलाईन टीम / झ्युरिच :
कोरोनाची कोणतीही लक्षणे नसलेल्या रुग्णांचे निदान आता स्वित्झर्लंडची ‘रॉश’ कंपनी करणार आहे. रॉश ही स्वित्झर्लंडची फार्मस्युटिकल कंपनी असून, तिला अँटीबॉडी चाचणी करण्याची परवानगी अमेरिकेच्या अन्न व औषध प्रशासनाने दिली आहे. रॉशचे डायग्नोस्टिक्स प्रमुख थॉमस शिनेकर यांनी याबाबतची माहिती दिली आहे.
शिनेकर यांनी वृत्तसंस्थेला दिलेल्या माहितीनुसार, कोरोनाचा संसर्ग झालेले आणि कोरोनाचा संसर्ग होऊनही कोणतीही लक्षणे न दिसणाऱ्या रुग्णांचे निदान रॉश कंपनी अँटीबॉडी चाचणीद्वारे करते. वर्षाअखेरपर्यंत या चाचणीचे उत्पादन दुप्पट करण्याचा कंपनीचा मानस आहे.प्रतिमहिना ही कंपनी 5 कोटीऐवजी 10 कोटी चाचण्यांचे उत्पादन करेल.
जगभरात दिवसेंदिवस कोरोनाचा संसर्ग वाढत आहे. त्यातच कोरोनाची कोणतीही लक्षणे नसलेले रुग्ण कोरोना पॉझिटिव्ह आढळत असल्याने त्यांना ओळखणे कठीण झाले आहे. कोविड-19 चे संक्रमण ओळखण्यासाठी मॉलिक्युलर चाचणीही करण्यात येणार आहे. अँटीबॉडी चाचणीच्या अचूकतेचा दर 99.8% टक्के असून, सेन्सिटिव्हिटी 100 टक्के आहे. त्यामुळे चाचणीचे निष्कर्ष फार कमी वेळा चुकतात. या चाचणीसाठी माणसांच्या शिरेतून रक्त घेतले जाते.