लाखांचा ऐवज लंपास करून महिलांना घरात कोंडून घातले
चारचाकीही फोडली, चाकूचा धाक दाखवून लुबाडणूक, दरोडेखोर सीसीटीव्हीत कैद
प्रतिनिधी / मिरज
मिरज-पंढरपूर रस्त्यावर तानंग फाटा येथे शनिवारी रात्री 12 च्या सुमारास पाच जणांच्या दरोडेखोरांच्या टोळीने अक्षरश धुमाकूळ घालत रोख रक्कम, दागिने, मोबाईल, धान्य आणि तेलाचे डबे असा लाखभर रुपयांचा ऐवज लंपास केला. इस्सार पेट्रोल पंपाजवळील अजंठा प्रिकास्ट या सिमेंट पाईप कंपनीत काम करणाऱ्या महिलांच्या घरांना बाहेरुन कडी लावून दरोडेखोरांनी थरार माजविला. त्यानंतर रस्त्यावरुन जाणाऱ्या एका चारचाकीवर लोखंडी पार मारुन काचा फोडल्या. सदरचे दरोडेखोर सीसीटीव्हीत कैद झाले आहेत. याप्रकरणी पोलिस उपाधीक्षक अशोक वीरकर यांनी घटनास्थळी भेट देऊन पाहणी केली. श्वान पथक, ठसे तज्ञांना पाचारण करुन दरोडेखोरांचा शोध घेतला जात आहे.