प्रतिनिधी / सातारा :
सातारा शहरातील गोडोली परिसरात असणाऱ्या साईमंगल अपार्टमेंटमधील दोन फ्लॅट फोडून अज्ञात चोरट्यांनी सोन्याचे दागिने व रोख रक्कम असा एकूण 1 लाख 94 हजार 200 रुपयांच्या ऐवजावर डल्ला मारला आहे.
याबाबत पोलिसांनी दिलेली माहिती अशी, दि. 1 रोजी दुपारी सव्वादोन ते रात्री 7.30 दरम्यान ही घटना घडली आहे. यामध्ये गोडोलीतील साईमंगल अपार्टमेंटमधील वैभव अनिल मस्के यांचा फ्लॅट क्रमांक 6 व प्रज्ञा भगवानराव सपाटे यांचा तिसऱ्या मजल्यावरील फ्लॅट क्रमांक 11 मध्ये ही घरफोडी झाली. या बंद फ्लॅटच्या दरवाजांची कुलपे तोडून अज्ञात चोरट्यांनी घरात प्रवेश केला. या दोन्ही फ्लॅटमधून सोन्याचांदीचे दागिने, रोख रक्कम असा एकूण 1 लाख 92 हजार 200 रुपयांचा ऐवज चोरट्यांनी लंपास केला. अधिक तपास पोलीस उपनिरीक्षक जाधव करत आहेत.