वृत्तसंस्था/ नवी दिल्ली
अखिल भारतीय फुटबॉल फेडरेशनची वार्षिक सर्वसाधारण बैठक सोमवारी आयोजित केली आहे. दरम्यान या बैठकीवेळी फेडरेशनच्या कार्यकारिणी समितीची निवडणूक होणार नाही. अखिल भारतीय फुटबॉल फेडरेशनला व्यवस्थापन घडामोडी स्वतंत्रपणे हाताळताना नियमांचे पालन करण्याचा आदेश फिफाने दिला आहे.
अखिल भारतीय फुटबॉल फेडरेशनच्या विद्यमान कार्यकारी समितीचा चार वर्षांचा कालावधी सोमवारी संपत आहे. दरम्यान फेडरेशनचे अध्यक्ष प्रफुल पटेल यांच्या अध्यक्षतेखाली सोमवारी होणाऱया वार्षिक सर्वसाधारण बैठकीवेळी कार्यकारी समितीची निवडणूक घेण्यात येणार होती. पण फिफाच्या आदेशानुसार ही निवडणूक आता घेतली जाणार नाही. 2012 सालापासून प्रफुल्ल पटेल हे अखिल भारतीय फुटबॉल फेडरेशनचे अध्यक्ष आहेत. आता त्यांना क्रीडा नियमावलीनुसार यावेळी निवडणूक लढविता येणार नाही. गेल्या महिन्यात फुटबॉल फेडरेशनतर्फे सर्वोच्च न्यायालयात अर्ज दाखल करण्यात आला असून फेडरेशनच्या कार्यकारिणी समितीचा कालावधी संपला असल्याने आगामी निवडणुकीसाठी नव्या घटनेखाली प्रशासकांची नियुक्ती न्यायालयाकडून झाली नसल्याने ही निवडणूक सोमवारी घेतली जाणार नाही.