सातारा / प्रतिनिधी :
वाई शहरातही लॉकडाऊनच्या दुसऱ्या दिवशी शुकशुकाट जाणवत होता. मंगळवारी सायंकाळी उशीरा अप्पर पोलीस अधीक्षक धीरज पाटील यांनी वाई शहराला भेट दिली. वाई शहरातील कोरोनाच्या पार्श्वभूमीवर बंदोबस्ताचा आढावा घेतला. विनाकारण बाहेर पडणाऱ्या नागरिकांना घरी रहा, सुरक्षित रहा, असे आवाहन त्यांनी केले. त्यानंतर त्यांनी मेणवली या गावास भेट दिली.
कोरोनाचा प्रार्दूभाव रोखण्यासाठी जिल्हा प्रशासनाने मंगळवारपासून कडक लॉकडाऊन जाहीर केला आहे. मंगळवारी दिवसभर वाई शहरात कडकडीत शुकशुकाट दिसत होता. बुधवारी सकाळपासून तिच परिस्थिती होती. मंगळवारी सायंकाळी अचानक अप्पर पोलीस अधीक्षक पाटील यांनी वाई शहराला भेट दिली. त्यांनी वाई शहरातील परिस्थितीचा आढावा घेतला. वाई शहरात बाहेरुन कोणी येवू नये आणि वाई शहरातून बाहेर कोणी जावू नये असे नियोजन केल्याचे वाई पोलीस ठाण्याचे पोली निरीक्षक आंनदराव खोबरे यांनी त्यांना माहिती दिली.
वाई शहरात बंदोबस्ताकरता 80 पोलीस कर्मचारी, स्ट्रायकिंग फोर्सचा बंदोबस्त ठेवला आहे. तसेच शहरातील किसनवीर चौक, परटाचा पार, सह्याद्रीनगर तिकाटणे आदी ठिकाणी बंदोबस्त आहे. बाहेरुन येणाऱ्या वाहनांची नोंद घेतली जाते आहे काय?, कारवाई केली जाते आहे काय याची त्यांनी माहिती घेतली. धीरज पाटील यांनी सुचना देत पुढे मेणवली या गावास भेट देवून तेथील घरी राहण्याचे नागरिकांना आवाहन केले.