मैत्रिणीचा दुर्घटनास्थळीच मृत्यू
तमिळ अभिनेत्री यशिका आनंद शनिवारी रात्री एका भीषण कार दुर्घटनेत सापडली आहे. महाबलीपुरमच्या ईस्ट कोस्ट रोडवर ही दुर्घटना घडली आहे. या दुर्घटनेत यशिका गंभीर जखमी झाली असून तिला रुग्णालयात दाखल करण्यात आले आहे. तर तिच्या एका मैत्रिणीचा या दुर्घटनेत घटनास्थळीच मृत्यू झाला आहे.
यशिकाची कार दुभाजकाला आदळली होती. दुर्घटनेनंतर यशिकासमवेत तीन जणांना कारमधून बाहेर काढण्यात आले. तिघांनाही नजीकच्या रुग्णालयात हलविण्यात आले. तर यशिकाची मैत्रिण वल्लिचेट्टी भवानी ही कारमध्येच अडकून पडली होती. तिला वाचविण्यापूर्वीच तिचा मृत्यू झाला. महाबलीपुरम पोलिसांनी गुन्हा नोंदवून या दुर्घटनेचा तपास सुरू केला आहे. मद्याच्या नशेत वाहन चालविले जात होते असा पोलिसांना संशय आहे.
यशिका आनंद टीव्ही रियलिटी शो ‘बिग बॉस तमिळ 2’मध्ये दिसून आली होती. यशिकाने ‘कवालई वेंदम’ या तमिळ चित्रपटामधून पदार्पण केले होते. ‘धुरुवंगल पथिनारु’ चित्रपटामुळे तिला ओळख मिळाली होती. याचबरोबर तिने ‘अरुट्टु आरायिल मुराट्टू कुतु’ ‘जोंबी’ यासारख्या चित्रपटांमध्ये काम केले होते.