वृत्तसंस्था/ सॅन फ्रान्सिस्को
अमेरिकेच्या कॅलिफोर्निया प्रांतात सोमवारी एक छोटे विमान नागरी भागात कोसळले आहे. हे विमान दोन घरांवर कोसळले आणि स्फोटानंतर तेथे आग लागली आहे. एका डिलिव्हरी ट्रकसमवेत अनेक वाहने या स्फोटाच्या भक्ष्यस्थानी सापडली आहेत. या दुर्घटनेत 2 जणांचा मृत्यू झाला असून 4 जण जखमी झाले आहेत. तर 10 घरांचे मोठे नुकसान झाले आहे.
विमान कोसळल्यानंतरची चित्रफित समोर आली आहे. यात घरे आणि वाहने पेटत असताना दिसून येते. स्फोटाचा आवाज ऐकताच पेटत असलेल्या घरांच्या दिशेने धाव घेतली आणि आत अडकून पडलेल्या लोकांना बाहेर काढण्यास सुरुवात केल्याचे स्थानिकांनी सांगितले. तर एका डिलिव्हरी ट्रकच्या चालकाचा घटनास्थळीच मृत्यू झाला आहे.
हे विमान दुपारी 12 वाजण्याच्या सुमारास कॅलिफोर्नियाच्या सेंटी शहरात कोसळले आह. हे एक ट्विटन इंजिन 6 आसनी विमान होते, जे ऍरिझोनामधून झेपावले होते. दुर्घटनास्थळानजीकच एक शाळा आहे. सुदैवाने या दुर्घटनेत कुठल्याच विद्यार्थ्याला ईजा झालेली नाही.