आज सुनावण्यात येणार शिक्षा, मुत्यानट्टी परिसरातील घटना
प्रतिनिधी/ बेळगाव
मित्रासोबत फिरायला गेलेल्या अल्पवयीन मुलीवर लैंगिक अत्याचार केलेल्या नराधमांना न्यायालयाने दोषी ठरविले आहे. काकती पोलीस स्थानकाच्या हद्दीमध्ये या घडलेल्या घटनेनंतर मोठी खळबळ उडाली होती. या घटनेने तीव्र संतापही व्यक्त करण्यात आला होता. अखेर त्या नराधमांना न्यायालयाने दोषी ठरविले असून शुक्रवार दि. 13 रोजी त्या सर्वांना शिक्षा सुनावण्यात येणार आहे.
संजू सिद्धाप्पा दड्डी (वय 24), सुरेश भरमाप्पा बेळगावी (वय 24), सुनील लगमाप्पा डुमगोळ (वय 21, तिघेही रा. मुत्यानट्टी), महेश बाळाप्पा शिवनगोळ (वय 23, रा. मणगुत्ती, ता. हुक्केरी) आणि सोमशेखर दुरदुंडेश्वर शहापूर (वय 23, रा. बैलहोंगल) अशी त्या आरोपींची नावे आहेत. बेळगाव येथील हॉस्टेलमध्ये राहणाऱया अल्पवयीन मुलीला तिच्या मित्राने मुत्यानट्टी परिसरात फिरण्यासाठी नेले होते. 15 फेब्रुवारी 2017 रोजी सायंकाळी 5.30 वाजण्याच्या सुमारास गेले असता वरील पाच जणांनी त्या दोघांनाही अडविले.
त्यानंतर शिवीगाळ करुन मारहाण केली. अल्वपयीन मुलीवर पाच जणांनी लैंािrगक अत्याचार केले. त्याचा व्हिडीओही तयार केला. याचबरोबर दोन्ही मोबाईल घेऊन 20 हजार रुपये द्या, अशी मागणी केली. ही घटना कोणालाही सांगायची नाही असे म्हणून त्यांना धमकीही देण्यात आली. त्यानंतर दुचाकीतील पेट्रोलही काढून घेण्यात आले होते. यामुळे हे दोघे जण खासगी वाहनातून राष्ट्रीय महामार्गापर्यंत आले.
या दोघांनी काकती पोलीसस्थानकात त्या पाच जणांविरोधात फिर्याद दिली होती. काकती पोलीस स्थानकाचे तत्कालीन पोलीस निरीक्षक रमेश गोकाक यांनी या पाच जणांच्याविरोधात भा.दं.वि. 376(बी), 395, 341, 354, 385, 504, 506 व पोक्सो 4, 6, 12 अन्वये गुन्हा नोंदविला. तिसरे अतिरिक्त जिल्हासत्र न्यायालय आणि पोक्सो न्यायालयात येथे दोषारोप दाखल केले. त्या ठिकाणी 33 साक्षी, 186 कागदपत्रे पुरावे, 46 मुद्देमाल तपासण्यात आले. त्यामध्ये हे सर्व जण दोषी आढळले आहेत. त्यांना न्यायाधीश मंजप्पा अन्नयण्णावर यांनी दोषी ठरविले असून शुक्रवारी शिक्षा सुनावण्यात येणार आहे. या खटल्यात सरकारी वकील म्हणून एल. व्ही. पाटील यांनी काम पाहिले.