वार्ताहर/ परळी
गेल्या काही दिवसांपासून उन्हाच्या झळा वाढू लागल्या होत्या. एकीकडे कोरोनाचे संकट आणि दुसरीकडे घरात उकाडा अशा वातावरणात दोन वेळा हुलकावणी दिलेल्या अवकाळी पावसाने सातारा शहरासह परळी खोऱयात धुवाँधार बरसात करत दोन ते तीन तास चांगलेच झोडपून काढले धुवाँधार पाऊस अन् नालेसफाई न झाल्याने डोंगरावरील मातीचे लोट हे रस्त्यावर आल्याने ठिकाणी वाहनधारकांना प्रवास करताना कसरत करावी लागत आहे.
परळी ते केळवली या मार्गाची दुरुस्ती गेली कित्येक वर्षे झालेली नाही. तसेच रस्त्या नजीकच्या नाल्याची खुदाई न केल्याने गुरुवारी झालेल्या अवकाळी पावसाने डोंगरावरील मातीचे लोट रस्त्यावर आले यामुळे वाहनधारकांची त्रेधातिरपीट उडत आहे तरी संबंधित प्रशासनाने रस्तेदुरुस्ती केली तर नाहीच पण नाली खुदाई तरी करा अशी मागणी स्थानिक ग्रामस्थ करत आहे.
मातीचे लोट देताहेत अपघातांना आमंत्रण
परळी ते केळवली या मार्गावरील नालेसफाई न झाल्याने गुरुवारी झालेल्या अवकाळी पावसाने डोंगरावरील मातीचे लोट हे रस्त्यावर आल्याने वाहनधारकांना रस्त्याचा अंदाज घेता येत नाही. यामुळे छोटे-मोठे अपघातांना एकप्रकारे आमंत्रण मिळत आहे.