ऑनलाईन टीम / काबुल :
तालिबानने सत्ता काबीज केल्यानंतर अफगाणिस्तानातील परिस्थिती हाताबाहेर गेली आहे. असे असतानाच अफगाणिस्तानचे माजी राष्ट्राध्यक्ष अशरफ घनी यांचे बंधू हशमत घनी तालिबानमध्ये सामील झाले आहेत. त्यामुळे दहशतवादी गटाला बळ येण्याची शक्यता आहे.
सूत्रांनी दिलेल्या माहितीनुसार, हशमत घनी यांना अफगाणिस्तानचे राजकारण आणि मुत्सद्देगिरी चांगलीच ठाऊक आहे. याचा थेट फायदा तालिबानला होईल. अफगाणिस्तान तालिबानने ताब्यात घेतल्यानंतर हशरफ यांनी तालिबानला पाठिंबा देण्याचा निर्णय घेतला होता. आता ते या दहशतवादी गटात सामील झाले आहेत.
अफगाणिस्तानचा पुढचा राष्ट्राध्यक्ष कोण असेल, यावर तालिबानी नेत्यांचे एकमत होऊ शकत नाही. मुल्ला बरादर यांना यापूर्वी राष्ट्राध्यक्ष व्हायचे होते, पण दहशतवादी संघटनेत बरादर यांच्याविरोधात आवाज उठविण्यात आला. त्यामुळे बरादर याला राष्ट्राध्यक्ष बनवण्यात आले नव्हते.