नवी दिल्ली/प्रतिनिधी
उत्तर प्रदेश विधानसभा निवडणूक २०२२ ची रणधुमाळी आतापासूनच सुरु झाली आहे. बागपतमध्ये दाखल झालेल्या भारतीय किसान युनियनचे (बीकेयू) नेते राकेश टिकैत यांनी आता एआयएमआयएमचे राष्ट्रीय अध्यक्ष असदुद्दीन ओवेसी यांच्यावर जोरदार निशाणा साधला आहे. दरम्यान राकेश टिकैत हे दिल्लीत सुरु असणाऱ्या आंदोलनाचे नेतृत्व करत आहेत. त्यांनी वारंवार भाजप सरकारवर टीका केली आहे.
दरम्यान, उत्तर प्रदेश विधानसभा निवडणूक २०२२ च्या निमित्ताने सुरु झालेल्या राजकीय रणसंग्रामात ‘अब्बा जान’ नंतर आता ‘चाचाजान’ची एंट्री झाली आहे. कारण, यावेळी, राकेश टिकैत यांनी ओवैसी यांचा उल्लेख भाजपाचे ‘चाचाजान’ असा केला आहे. “भाजपाचे ‘चाचाजान’ ओवेसी आता उत्तर प्रदेशात आले आहेत. तेच भाजपला विजयाकडे घेऊन जातील. आता काहीच अडचण नाही”, असा टोला यावेळी टिकैतांनी लगावला आहे.
राकेश टिकैत यांनी “भाजपाचे चाचाजान असदुद्दीन ओवेसी उत्तर प्रदेशात दाखल झाले आहेत. त्यामुळे, त्यांनी (ओवेसींनी) त्यांच्यावर (भाजपाला) अत्यंत कठोर शब्दांत जरी टीका केली तरीही त्यांच्यावर कोणताही गुन्हा दाखल केला जाणार नाही. कारण, ते दोघेही एकाच टीममधील आहेत”, अशी थेट टीका राकेश टिकैत यांनी यावेळी केली आहे.