ऑनलाईन टीम / मुंबई :
सिटी बँक घोटाळ्याप्रकरणी शिवसेनेचे माजी खासदार आनंदराव अडसूळ आणि त्याचे पुत्र अभिजीत अडसूळ यांना ईडीने समन्स बजावले आहे. बडनेराचे आमदार रवि राणा यांच्या तक्रारीवरुन ईडी या पितापुत्राची चौकशी करणार आहे.
सीटी बँकेमध्ये जवळपास नऊ हजार खातेधारक होते. या खातेधारांचे पैसे अवैधरित्या बिल्डरांना वाटून त्यामध्ये आडसूळ यांनी 20 टक्के कमेशन घेतले. त्यामुळे बँकेत 980 कोटींचा घोटाळा झाल्याचा आरोप आडसूळ यांच्यावर करण्यात आला आहे. त्यामुळे ईडीने अडसूळ पितापुत्राला चौकशीसाठी हजर राहण्याचे आदेश दिले आहेत.
दरम्यान, अडसूळ यांच्या घरी सकाळीच ईडीचे अधिकारी दाखल झाले असून, त्यांनी अडसूळ यांना चौकशीसाठी हजर राहण्याचे समन्स बजावले आहे. अडसूळ यांनी त्यांच्यावरील सर्व आरोप फेटाळून लावले आहेत. सिटी बँकेची उलाढाल 800 कोटींची असताना 980 कोटींचा घोटाळा झालाच कसा? असा सवाल त्यांनी उपस्थित केला आहे. तसेच बँकेतील घोटाळ्याची माहिती मिळाल्यावर मी बँक अधिकाऱयांविरोधात फसवणुकीचा तपास करणाऱया संस्थांकडे तक्रार दिली आहे, असे अडसूळ यांनी सांगितले.