नवी दिल्ली
ऍपलने आपल्या ‘स्प्रिंग लोडेड इव्हेंट-2021’मध्ये नवीन आयपॅड प्रो सादर करण्यासोबत अन्य उत्पादने सादर केली आहेत. या कार्यक्रमानंतर आता आयफोन 13 मिनी या आयफोनचे फोटो समोर आले आहेत. सदर फोटोमध्ये फोनचे बॅक पॅनेल दिसत असून अन्य वेगळेपणही स्पष्ट होत आहे. तसेच आयफोन 13 मिनी प्रोटोटाइपचा हा फोटो आयफोन 12 मिनी या मॉडेलसोबत मिळताजुळता असल्याचे जीएसएम एरिना यांनी सादर केलेल्या अहवालामधून स्पष्ट केले आहे.
आयफोन 13 मिनीच्या बॅक पॅनेलवर डबल रियर कॅमेरा दिसून येत आहे. याला क्रॉस डिझाइनमध्ये सेटअप केले आहे. वर लेंससोबत एलइडी फ्लॅश दिला असून कॅमेरा किती मेगापिक्सल आहे, या संदर्भात कोणतीही माहिती दिलेली नाही.
2022 मध्ये मिनी आयफोन बंद?
ऍपल 2022 मध्ये आयफोन बंद करण्याच्या तयारीत आहे, असेही समजते. टीएफ सिक्युरिटी ऍनालिस्ट मिंगची कुओ यांच्या मतानुसार कंपनी एक वर्षानंतर 5.4 इंच स्क्रीन असणारा मिनी आयफोन बंद करणार असल्याची माहिती आहे.