ऑनलाईन टीम / मुंबई :
आरेत धूमाकूळ घालणारा बिबट्या अखेर आज पहाटे वनविभागाने जेरबंद केला. बिबट्याला पकडण्यासाठी वनविभागाने आरे युनिट नंबर 3 मध्ये गुरुवारी पिंजरा लावला. रात्रभर जागता पाहरा ठेवण्यात आला होता. पहाटे तीनच्या सुमारास हा बिबटय़ा वनविभागाने लावलेल्या पिंजऱयात अडकला. वनविभागाने यासंदर्भात माध्यमांना माहिती दिली.
आरेमध्ये मागील महिनाभरापासून बिबट्याने दहशत माजवली होती. या बिबटय़ाने 5 जणांवर हल्ला केल्याने नागरिकांमध्ये भीतीचे वातावरण होते. दोन दिवसांपूर्वीच बिबट्याचे पिल्लू वनविभागाला सापडले होते. आज पहाटे बिबट्याही जेरबंद झाला. त्या बिबट्याची आज संजय गांधी राष्ट्रीय उद्यानात वैद्यकीय तपासणी करण्यात येणार आहे. त्यामुळे आरेत दहशत माजवणारा हाच तो बिबट्या आहे का, याची शहानिशा होईल.