ऑनलाईन टीम / पुणे :
गाई-म्हशींच्या दूधाच्या दरात उद्यापासून (रविवार) दोन रुपयांची वाढ होणार आहे. पुण्यात झालेल्या कल्याणकारी दूध संघाच्या बैठकीत हा निर्णय घेण्यात आला आहे.
त्यामुळे उद्यापासून गाईचे दूध 48 तर म्हशीचे दूध 58 रुपये प्रतिलिटर दराने ग्राहकांना खरेदी करावे लागणार आहे. दूध दरवाढीमुळे सर्वसामान्य गृहीणींचे बजेट आता काहीशे कोलमडणार आहे. दरवर्षी हिवाळ्यात दुध उत्पादन वाढते. मात्र, यंदा उशिरापर्यंत झालेल्या पावसाने दूध उत्पादन दहा टक्क्यांनी घटले आहे. त्यामुळे दूध संघाला दूधाच्या दरात वाढ करण्याचा निर्णय घ्यावा लागला. जून्या दरानुसार गाईचे दूध 46 तर म्हशीचे 56 रुपये प्रतिलिटर दराने विकले जात होते. उद्यापासून ते अनुक्रमे 48 आणि 58 रुपये प्रतिलिटर दराने विकले जाईल, असा निर्णय या बैठकीत घेण्यात आला.
या बैठकीला राज्य कल्याणकारी दूध संघाचे अध्यक्ष गोपाळराव म्हस्के, सचिव प्रकाश कुतवळ, खजिनदार डॉ. विवेक क्षीरसागर यांच्यासह अन्य सदस्य उपस्थित होते.