आरोग्य मंत्रालयाकडून शिफारसींना मंजुरी
@ वृत्तसंस्था / नवी दिल्ली
अखिल भारतीय आयुर्विज्ञान संस्थानने (एम्स) रुग्णांच्या उपचाराबाबत मोठा निर्णय घेतला आहे. एम्सने आता 500 रुपयांपेक्षा कमी खर्चाच्या सर्व वैद्यकीय चाचण्यांकरता कुठलेच शुल्क न आकारण्याचा निर्णय लागू केला आहे. केंद्रीय आरोग्य मंत्रालयाने यासंबंधीच्या शिफारशींना मंजुरी दिली आहे.
या निर्णयानंतर एम्समध्ये आता रक्तचाचणीपासून एक्सरे, सीटी स्कॅन इत्यादी सर्व अन्य चाचण्यांची सुविधा मोफत मिळणार आहे. आतापर्यंत या सर्व चाचण्यांसाठी एम्समधील काऊंटरवर शुल्क भरावे लागत होते.
एम्समध्ये प्रतिदिन सुमारे 50 ते 80 हजार चाचण्या केल्या जातात. परंतु आता या चाचण्या मोफत करण्यात आल्याने रुग्णांना मोठा दिलासा मिळू शकणार आहे. तर रुग्णांना या चाचण्यांचा अहवाल त्याचदिवशी ऑनलाईन उपलब्ध केला जाणार आहे.