ऑनलाईन टीम / मुंबई :
एसटी कर्मचाऱ्यांचे एका महिन्याचे वेतन एका तासात दिले जाईल, अशी घोषणा परिवहन मंत्री अनिल परब यांनी पत्रकार परिषदेमध्ये दिली.
- दिवाळीपूर्वी मिळणार दोन महिन्याचे वेतन
ते म्हणाले, एसटी कर्मचाऱ्यांचे एक महिन्याचे वेतन काही तासात म्हणजेच आजच जमा केले जाईल. तर राहिलेल्या दोन महिन्यांचे वेतन दिवाळीपूर्वी दिले जाईल असेही त्यांनी यावेळी सांगितले. तसेच एसटी कर्मचाऱ्यांना दिवाळीपूर्वी बोनसही दिला जाईल, असेही त्यांनी यावेळी स्पष्ट केले.
कर्मचाऱ्यांच्या वेतनाबाबत आमची मुख्यमंत्री, उपमुख्यमंत्री यांच्यासोबत चर्चा सुरू आहे. बँकेकडे कर्ज मागितले आहे, असेही त्यांनी यावेळी सांगितले. तसेच, कर्मचाऱ्यांनी आत्महत्येसारखे टोकाचे पाऊल उचलू नये. तसेच दुःखी होऊन कोणताही टोकाचा निर्णय घेऊ नये, असे आवाहनही त्यांनी यावेळी कर्मचाऱ्यांना केले आहे.
दरम्यान, मागील तीन महिन्यांपासून वेतन न मिळाल्याने राज्य मार्ग परिवहन महामंडळाच्या कामगारांनी आज राज्यभरात आक्रोश आंदोलन केले आहे.