प्रतिनिधी / दापोली
आंदोलनात सहभागी झाल्याचा, लोकांची गैरसोय केल्याचा व न्यायालयाचा अवमान केल्याचा ठपका ठेवून दापोलीतील तब्बल 18 एसटी कर्मचारी यांना निलंबित करण्यात आलेले आहे. यामुळे मोठी खळबळ उडाली असून यात वाहक व चालक यांचा समावेश आहे.
दापोलीत 400 एस टी कर्मचारी आहेत. हे सर्व एसटी कर्मचारी दापोली एसटी डेपो मध्ये आंदोलनाला बसलेले होते. त्यांना दोन दिवसांपूर्वी एसटी प्रशासनाने दापोली डेपो मध्ये आंदोलन करण्यास मज्जाव केला व त्यांना दापोली डेपोतून बाहेर जाण्यास सांगितले.
शिवाय महामंडळाच्या विश्रांतीगृहातून देखील बाहेरच्या जिल्ह्यातील कर्मचाऱ्यांना काही दिवसापूर्वी तडकाफडकी बाहेर काढण्यात आले. या सर्वांनी ती रात्र दापोली बसस्थानकात थंडीमध्ये उघड्यावर घालवली. सध्या एसटी स्टॅन्ड परिसरात हे सर्व एसटी कर्मचारी दिवसभर फिरताना दिसून येतात. मात्र सध्या बैठे आंदोलन जागे अभावी स्थगित करण्यात आले आहे अशी माहिती एसटी कर्मचाऱ्यांनी तरुण भारतला दिली.