ऑनलाईन टीम / औरंगाबाद :
महाराष्ट्रात कोरोना रुग्णांची संख्या वेगाने वाढत आहे. औरंगाबादमध्ये देखील गेल्या आठवड्यापासून प्रतिदिन रुग्ण संख्या झपाट्याने वाढताना दिसत आहे. त्यातच आता औरंगाबादचे खासदार इम्तियाज जलील यांना देखील कोरोनाची लागण झाली आहे. त्यांनी स्वतः ट्विट करत याबाबत माहिती दिली.
ते आपल्या ट्विटमध्ये म्हणाले की, सर्वांना माझा नमस्कार, माझा कोरोनाचा रिपोर्ट पॉझिटिव्ह आला आहे. तीन दिवसांपूर्वी माझ्यात कोरोनाची लक्षणे दिसली होती. त्यानंतर मी स्वतः ला वेगळे केले होते. सध्या कोरोनावर उपचार घेत असून, आपण सर्वांनी घरी सुरक्षित राहावे तसेच मागील काही दिवसात माझ्या संपर्कात आलेल्यांनी स्वतःची चाचणी करून घ्यावी असे आवाहन देखील त्यांनी यावेळी केले आहे.
दरम्यान, गेल्या काही दिवसांमध्ये ठाकरे सरकारमधील अनेक बड्या नेत्यांना कोरोनची लागण झाली आहे. यामध्ये आरोग्यमंत्री राजेश टोपे, छगन भुजबळ, जयंत पाटील, बच्चू कडू, एकनाथ खडसे, राजेंद्र शिंगणे यांचा समावेश आहे.