कराड / प्रतिनिधी :
बहिणीला त्रास देत असल्याच्या कारणावरून मेहुण्याने २१ वर्षीय दाजीचा खून केल्याची घटना वाखाण परिसरात घडली. खुनाच्या घटनेनंतर २६ वर्षीय संशयित मेहुणा स्वत:हून कराड शहर पोलिसात हजर झाला. दरम्यान खून झालेला आणि खून केलेल्यांचे कुटूंब परजिल्ह्यातील असून कराडला ते कामानिमित्त वास्तव्यास असतात.
पोलिसांकडून मिळालेली प्राथमिक माहिती अशी, वाखाण भागात कामानिमित्त परजिल्ह्यातील काही कुटूंबे वास्तव्यास आहेत. दरम्यान यातीलच एका कुटूंबातील पती आपल्या पत्नीला त्रास देत असल्याचे समोर येत आहेत. आपल्या बहिणीला नवरा त्रास देत असल्याचा राग भावाच्या मनात होता. यातूनच गुरूवारी रात्री अशीरा बहिणीला त्रास देणाऱ्या दाजीचा मेहुण्याने गळा आवळत छातीवर दगड मारून खून केला. खुनाच्या घटनेनंतर संशयित स्वत: पोलीस ठाण्यात हजर झाला. वरिष्ठ पोलीस निरिक्षक बी. आर. पाटील, उपनिरिक्षक अर्जुन चोरगे, सहाय्यक फौजदार संतोष सपाटे यांच्यासह पोलीस घटनास्थळी दाखल झाले. पोलिसांनी घटनेचा पंचनामा करून मृतदेह शवविच्छेदनासाठी पाठवला. याप्रकरणी कराड शहर पोलिसांत नोंद करण्याचे काम सुरू आहे.