बेंगळूर/प्रतिनिधी
कर्नाटकात आतापर्यंत म्युकरमायकोसिसचे २,८५६ रुग्ण आढळले असून त्यापैकी २२५ जणांना आपला जीव गमवावा लागला आहे, अशी माहिती राज्याच्या आरोग्य विभागाने दिली आहे. आरोग्य विभागाने सामायिक केलेल्या आकडेवारीनुसार, राज्यभरातील विविध रुग्णालयात २,३१६ रूग्णांवर उपचार सुरू आहेत. त्यापैकी १९१ बरे झाले आहेत, तर २२५ जणांना आपला जीव गमवावा लागला आहे. तसेच १२४ जणांना वैद्यकीय सल्ल्याविरूद्ध सोडले, असे आरोग्य विभागाने म्हंटले आहे.
दरम्यान बेंगळूर येथे ब्लॅक फंगसचे सर्वात जास्त रुग्ण आहेत. ९५९ रुग्ण हे बेंगळूरमध्ये आहेत. त्यापैकी ८२५ रुग्णांवर रूग्णालयात उपचार सुरू आहेत, ४९ जण बरे झाले आहेत तर ७२ जण मृत्यूमुखी पडले आहेत. धारवाडमध्ये २२९, गुलबर्गामध्ये १६८, बेळगावमध्ये १५९, विजयपुरामध्ये १३०, चित्रदुर्गात १२६, बळ्ळारीमध्ये ११०, बागलकोटमध्ये १०९ आणि म्हैसूर आणि रायचूरमध्ये प्रत्येकी ९८ रुग्ण आहेत. .
कर्नाटकात कोरोनानंतर दुसरे मोठे संकट म्हणजे म्युकरमायकोसिस हे आहे. राज्यात कोरोना संसर्गाच्या वाढीबरोबरच, ब्लॅक फंगसचे प्रमाण देखील चिंताजनक आहे.दरम्यान राज्यात बहुतांशी कोरोना रुग्णांमध्ये ब्लॅक फंगसचा संसर्ग आढळून आला आहे.