बेंगळूर/प्रतिनिधी
कर्नाटकचे आरोग्य आणि वैद्यकीय शिक्षण मंत्री के सुधाकर यांनी नोव्हेंबरच्या अखेरीस प्रौढ नागरिकांचे लसीकरण पूर्ण करणार असल्याचा दावा केला आहे. आरोग्यमंत्री सुधाकर यांनी राज्यात कोरोना लसीकरणाच्या मोहिमेमध्ये कोणतीही अडचण येत नाही. तसेच “नोव्हेंबरच्या अखेरीस संपूर्ण प्रौढ लोकसंख्येचे पूर्णपणे लसीकरण करण्यासाठी आम्ही तयार आहोत, ” असे ते म्हणाले.
मंत्री सुधाकर यांनी स्पष्ट केले की ऑगस्टमध्ये राज्याला १.१ कोटीहून अधिक डोस मिळाले आणि सप्टेंबरमध्ये आतापर्यंत सुमारे ४८.९६ लाख डोस मिळाले आहेत. केंद्राकडून लसीचा असाच पुरवठा होत राहिल्यास लवकरच राज्यात पात्र लाभार्थ्यांचे लसीकरण पूर्ण होईल.
आरोग्य आणि कुटुंब कल्याण विभागाने जारी केलेल्या आकडेवारीनुसार, आजपर्यंत राज्यभरात कोरोना लसीचे ४.७८ कोटी डोस देण्यात आले असून त्यापैकी १.२४ कोटी (जवळजवळ २६ टक्के) दुसरे डोस होते.