बेंगळूर/प्रतिनिधी
कर्नाटक बेंगळूरमधील राजराजेश्वरी नगर (आरआर नगर) आणि तुमकूर जिल्ह्यातील सीरा या दोन विधानसभा मतदार संघांच्या पोटनिवडणुकीसाठी मंगळवारी मतदान झाले. दोन्ही मतदार संघात मतदान प्रक्रिया सुरळीत पार पडली.
सीरा मतदारसंघासाठी एकूण ८२.३१ टक्के मतदान झाले, तर राजराजेश्वरी नगर मतदार संघात केवळ ४५.२४ टक्के मतदान झाले. २०१८ च्या विधानसभा निवडणुकीत आरआर नगरमध्ये ५४ टक्के आणि सीरा येथे ८४.३१ टक्के मतदान झाले होते. दरम्यान २०१८ च्या तुलनेत दोन्ही मतदार संघात मतदानाची टक्केवारी घटलेली आहे.
आरआरनगरला १४८ पॉझिटिव्ह रुग्णांनी पीपीई किट वापरून मतदान केंद्रावर जाऊन मतदान केले. तर सिरा मतदार संघातील निवडणुकीसाठी ३८ कोरोना पॉझिटिव्ह रुग्णांनी खबरदारी घेत मतदान केले. दरम्यान १० नोव्हेंबरला पोटनिवडणुकीचा निकाल जाहीर होणार आहे.