बेळगाव, बागलकोट, रायचूर जिल्ह्यांचा दौरा करणार
बेंगळूर/प्रतिनिधी
मुख्यमंत्री बी.एस. येडियुरप्पा आणि महसूलमंत्री आर. अशोक मंगळवारी राज्यातील पूरग्रस्त भागाचे हवाई सर्वेक्षण करणार आहेत. मुख्यमंत्री बेळगावमध्ये दाखल झाले असून त्यांच्या दौऱ्याला सुरुवात झाली आहे. यामध्ये ते बेळगाव, बागलकोट, रायचूर जिल्ह्यांचा दौरा करणार आहेत.
अधिकृत माहितीनुसार येडियुरप्पा मंगळवारी सकाळी एचएएल विमानतळावरून मंत्री अशोक यांच्याबरोबर खास विमानाने प्रथम बेळगाव विमानतळावर येतील. तेथून ते भारतीय हवाई दलाच्या हेलिकॉप्टरमध्ये बसून पूर परिस्थितीचा अंदाज घेतील. या वेळी ते बेघर लोक आणि पूरग्रस्त शेतकऱ्यांची भेट घेतील.
हवाई सर्वेक्षणानंतर त्यांना जिल्हाधिकाऱ्यांकडून झालेल्या नुकसानाची माहिती मिळेल आणि संबंधित अधिकाऱ्यांसमवेत बैठक घेतील. तेथून हेलिकॉप्टरच्या सहाय्याने बागलकोट आणि रायचूर जिल्ह्यातील आढावा घेईल. उपमुख्यमंत्री गोविंद , बागलकोट, रायचूर आणि गडाग जिल्ह्याचे प्रभारी मंत्रीही त्यांच्यासमवेत असतील. आढावा घेतल्यानंतर दोन्ही जिल्हा जिल्हाधिकाऱ्यांसमवेत बैठक घेतील.