प्रतिनिधी/आजरा
आजरा तालुक्याच्या पश्चिम भागासह जेऊर, चितळे परीसरात वावर असलेल्या हत्तीने शुक्रवारी रात्री आजरा शहरानजीकच्या कर्पेवाडी खालसा परिसरातील शेतात धुमाकूळ घातला. येथील भिकाजी पाटील यांच्या शेतातील केळी, सुपारीची झाडे मोडून टाकली, शिवाय ऊस पिकाचेही नुकसान केले.
आठ दिवसांपूर्वी हत्ती चितळे-जेऊर परीसरात ठाण मांडून होता. आजरा-चंदगड रस्ता ओलांडून आजऱयाकडे येताना जेऊर येथील ग्रामस्थांना हत्तीचे दर्शन झाले होते. चार दिवसांपासून याच परिसरात हत्तीचा वावर सुरू होता. शुक्रवारी रात्री आजरा शहरालगत असलेल्या कर्पेवाडी खालसा परिसरात हत्ती दाखल झाल्याने शहरावासीयांमध्ये भितीचे वातावरण पसरले आहे. पिकांचे सातत्याने नुकसान करीत असलेल्या हत्तींचा तातडीने बंदोबस्त करण्याची मागणी पाटील यांच्यासह या परीसरातील शेतकऱयांनी केली आहे.