कसबा सांगाव / वार्ताहर
कसबा सांगाव ता. कागल येथील गायरान जमीनीत सुरू असलेले बेकायदेशीर बांधकाम त्वरीत थाबवण्याची तसेच या जमीन प्रकरणी चौकशी चालु असताना देखील दिवाळीच्या सुट्टीचा गैरफायदा घेऊन विना बांधकाम परवाना सुरू असलेले बांधकाम थाबवून संबधितावर कारवाईची मागणी उपसरपंच व काही ग्रामपंचायत सदस्यांनी केली आहे.
या गायरान जमीनमध्ये बेकायदेशीर प्लॉट पाडून प्लॉट वाटप केल्याबाबत जिल्हाधिकारी कोल्हापूर, मुख्य कार्यकारी अधिकारी जिल्हा परिषद कोल्हापूर, तहसिलदार कागल, गटविकास अधिकारी कागल यांच्याकडे तक्रार दाखल करून दोषीवरीत कारवाईची मागणी केली होती. याबाबत चौकशी करून नियमानुसार योग्य ती कार्यवाही बाबतचे आदेश संबधित विभागानी दिलेले आहेत. निवेदनावर उपसरपंच विक्रमसिंह जाधव, राहुल हेरवाडे, दिपक हेगडे, संतोष मगदुम, सुर्यकांत माळी,रणजितसिंह जाधव यांच्या सहया आहेत. ग्रामपंचायतीच्या मनमानी कारभाराला कंटाळून या बेकायदेशीर प्लॉट वाटप बाबत उपसरपंच व पाच सदस्यांनी यापूर्वी राजीनामे दिले आहेत.