मोदी हटाव देश बचावचा खुर्चीवर बसून दिला नारा
प्रतिनिधी/ सातारा
कोरोनाच्या काळात भरमसाठ पेट्रोल डिझेलच्या किमंती वाढवण्यात येत आहेत. केंद्र सरकारने इंधन दरवाढ करुन जनतेच्या जखमेवर मीठ चोळण्याचे प्रकार सुरु आहे. त्याच्या निषेधार्थ माजी मुख्यमंत्री पृथ्वीराज चव्हाण यांच्या नेतृत्वाखाली काँग्रेस कमिटीच्यासमोर आंदोलन करण्यात आले. मोदी हटाव देश बचाव अशा घोषणा देण्यासाठी पदाधिकारी, कार्यकर्ते यांच्यामध्ये जोरदार चढाओढ सुरु होती.
या आंदोलनात मंत्री विश्वजित कदम, काँग्रेसचे जिल्हाध्यक्ष डॉ. सुरेश जाधव, युवकचे जिल्हाध्यक्ष विराज शिंदे, महिला जिल्हाध्यक्षा धनश्री महाडिक, मलकापूर नगरपालिकेचे मनोहर शिंदे, ऍड.दत्तात्रय धनावडे, नरेश देसाई, बाळासाहेब शिरसाट, धैर्यशील सुपले यांच्यासह प्रमुख पदाधिकारी व कार्यकर्ते उपस्थित होते. कार्यकर्त्यांनी हातात पाटय़ा धरल्या होत्या. इंधन दरवाढ कमी करण्यात यावी, अशा मागणीचे निवेदन शिष्टमंडळाने जिल्हाधिकारी शेखर सिंह यांना देण्यात आले. निवेदनात केंद्र शासन पुरेपुर अपयशी ठरलेले आहे. देशातील जनता संकटात सापडलेली असताना पेट्रोल, डिझेल दरवाढ करुन आणखी कर वाढवत आहे. हे कुठे तरी थांबवले पाहिजे, लोकांच्या खिशाला परवडेल अशी भूमिका सरकारने घ्यावी, अशी मागणी केली आहे.