बॉलिवूड अभिनेत्री सोनाक्षी सिन्हा हॉरर कॉमेडी चित्रपट ‘काकुडा’मध्ये दिसणार आहे. रॉनी स्क्रूवाला यांच्या या हॉरर कॉमेडी चित्रपटाचे चित्रिकरण पूर्ण झाले आहे. सोनाक्षीसोबत या चित्रपटात रितेश देशमुख आणि साकिब सलीम आहेत. जुलैमध्ये याचे चित्रिकरण सुरू झाले होते. चित्रिकरण पूर्ण झाल्यावर सोनाक्षीने चित्रपटाच्या पूर्ण टीमसोबत छायाचित्र काढून घेत तो स्वतःच्या इन्स्टाग्रामवर शेअर केला आहे.
काकुडाचा प्रवास अत्यंत वेगळा होता, कोरोनाशी लढून, पावसावर मात करून, नाइटशिफ्टमध्ये काम करून हा चित्रपट पूर्ण झाला आहे, उत्तम अनुभवासाठी पूर्ण टीमचे आभार असे सोनाक्षीने या छायाचित्रासोबतच्या कॅप्शनमध्ये म्हटले आहे.
काकुडाच्या माध्यमातून आदित्य सरपोतदार यांनी हिंदी चित्रपट दिग्दर्शनात पाऊल ठेवले आहे. आदित्याला ‘क्लासमेट्स, ‘माऊली’ आणि ‘फास्टर फेने’ या मराठी चित्रपटांसाठी ओळखले जाते. काकुडा चित्रपट पुढील वर्षी डिजिटल प्लॅटफॉर्मवर प्रदर्शित होणार आहे. या चित्रपटाची पटकथा अविनाश द्विवेदी आणि चिराग गर्ग यांनी लिहिली आहे. तर याचे चित्रिकरण गुजरातमध्ये पार पडले आहे.