प्रतिनिधी / काणकोण
काणकोणच्या पोलिसांनी मास्क न वापरणाऱयांवर कडक कारवाई सुरू केली असून 22 रोजी एकाच दिवशी मास्क न वापरता फिरणाऱया 60 जणांना दंड दिला. काणकोणच्या किनारपट्टीवर सध्या देशी पर्यटक गर्दी करायला लागले आहेत. सीमेवरून गोव्यात प्रवेश करताना परिधान केलेले मास्क गोव्यात प्रवेश केल्यानंतर बरेच जण वापरत नाहीत असे निदर्शनास आले आहे. त्यामुळे हमरस्त्यावर देखील पोलिसांनी तपासणी चालू ठेवली असल्याची माहिती काणकोणचे निरीक्षक प्रवीण गावस यांनी दिली. कोरोनाची दुसरी लाट येण्याची दाट शक्यता आहे. शाळा सुरू झालेल्या आहेत. शिवाय महाराष्ट्र आणि दिल्लीसारख्या भागांतून मोठय़ा प्रमाणात पर्यटक गोव्याकडे यायला लागले आहेत. अशा वेळी आपण सावधगिरी बाळगणे गरजेचे असल्याचे मत गावस यांनी व्यक्त केले.